„თბილისის სავაჭრო ცენტრებში კვ.მ-ის საშუალო ფასი $24.1, ბათუმში კი $23.1-ია“ - თიბისი კაპიტალი

April 2, 2025, 12:05 a.m.

"თიბისი კაპიტალის“ კომერციული უძრავი ქონების ბაზრის განახლებული კვლევის მიხედვით, ბოლო წლებში გაზრდილმა ეკონომიკურმა აქტივობამ კომერციული უძრავი ქონების სექტორზე პოზიტიური გავლენა იქონია, რასაც მოწმობს საცალო ვაჭრობის სექტორის ბრუნვის ზრდა. კვლევის მიხედვით მონაცემები 2019 წლიდან იზრდება.

როგორც კომპანიის უფროსმა ასოცირებულმა მკვლევარმა სალომე დეისაძემ გადაცემა „უძრავი ქონების პროსპექტში“ სტუმრობისას განაცხადა, თბილისში მდებარე 10 სავაჭრო ცენტრიდან ყველაზე იაფი ფასი კვ.მ-ზე $15-დან იწყება და $40-მდე მერყეობს. საიჯარო ფასები 2024 წელს წინა წელთან შედარებით 7%-ით გაიზარდა, ვაკანტურობის კოეფიციენტი კი - შემცირდა.

„გაზრდილი ბიზნესი აქტივობა დადებითად აისახება კომერციულ ქონებაზე, როგორც სავაჭრო ცენტრებზე, ისე ქუჩის რითეილზე და საოფისე სექტორზე. სამივე მიმართულებაში გაზრდილია საიჯარო შემოსავალი, ამის უკან კი დგას საცალო ვაჭრობის ბრუნვის ზრდა.

თბილისში 10 ძირითადი სავაჭრო ცენტრია, სადაც საშუალო იჯარა კვ.მ-ზე 2024 წლის ბოლოს არსებული მონაცემებით, $24.1-ს შეადგენს, ეს კი წინა წელთან შედარებით 7%-იანი ზრდაა.

ბათუმში ხუთი ცენტრია, ბოლოს დაემატა ერთი სავაჭრო ცენტრი და აქაც საშუალო ფასი $23.1-ია. მნიშვნელოვანია ვაკანტურობის კოეფიციენტი, თბილისის შემთხვევაში წინა წელთან შედარებით მაჩვენებელი შემცირდა და თბილისში 4.7%-ია და ბათუმში 5.4%.

ფასი უფრო მაღალია ისეთ ცენტრებში რომლებიც ცენტრშია და სადაც მობილობა მაღალია. ყველაზე იაფი $15-დია და იზრდება $40-მდე. რადგან გარკვეულ უბნებში დატვირთულობა მაღალია, ეს მიანიშნებს იმას, რომ დამატების პოტენციალი არსებობს. ყველაზე მნიშვნელოვანი სამომავლო მიწოდებიდან იქნება „აუთლეტ ვილიჯი,“ რომელიც მაისიდან გაიხსნება და რომელიც განსხვავებული კონცეფციის იქნება, ის ნიშურ მომხმარებელს მიიზიდავს,“ - აღნიშნა დეისაძემ.